SHILLONG: HNLC bobil dolni gitcham dilgipa Cheristerfield Thangkhiew-ko police-rangni so·otanina jegale, Sombar salo dingtang dingtang dolrangni, Barik point-o donggipa ‘U Kiang Nangbah’ Memorial-o asonge jingjengatengmiting somoio a·dokni saksa ja·delgimin journalist-ko kragija dake jak sokahani gimin Shillong Press Club, suk ong·gijaniko aro jegalaniko parakataha. Ia jingjengataniko KSU, FKJGP, HNYF aro RBYF dolrang nangrime ong·atangahachim aro ia jingjengatanio adita sak manderang, a·dokni saksa journalist-ko kragija dake jak sokahachim ine kobor on·aha.
Ia a·sel ong·ani ja·mano bakan ia jingjengataniko dakdilgipa dolrang, a·dokni kobor ra·timgipa dolrango aro kragija dake jak sokako man·gipa journalist-o kemako bi·aha aro dos dakgipa manderangko sandie nanga gita ja·kurangko de·na ku·rachakataha ineba kobor on·aha.
Indake ong·engon, ia a·sel ong·anina kemako bi·ahani gimin aro ong·gija dakgipa manderangko ua biaponiko a·rikgalatahani gimin Shillong Press Club, ia jingjengataniko dakdilgipa dolrangkoba dingtangmancha mittelpilataha.
Mikkangchi iandakgipa obostarang ong·taijachina aro a·doko namroro silroroaniko ra·bana apsan ja·kurangko de·angkuna ineba Shillong Press Club-ni dilgiparang, dingtang dingtang dolrangko ku·mongataha.
