TURA: Sombar pringo Tura-ni Hawakhana jolo donggipa dokkan ge·sako wa·al kamchengani ja·man, ia dokkano LPG cylinder goprete ja·mano gipin dokkanrangkoba aditan wa·al kamchapaha.
Mikrontangchi nikgipa manderangni u·iatani gitade, Sombar pring 11:00 bajimango Hawakhana-o donggipa dokkan ge·sao rang·san wa·al ching·gaoaha aro wa·al ching·gaoe aditani gisepon ia dokkano donggipa LPG cylinder gopretaha. LPG cylinder gopretani ja·man ia dokkanni sambao donggipa gipin dokkanrangkoba bewalan wa·al kamchapaha ine kobor on·aha.
Koborko man·soani bakan Fire & Emergency Service-ni gari aro sipairang ua biapona re·bae wa·alko kimitena man·aha indiba uamangni sokbana skangan dokkan ge·gittamkode bewal kamsoaha ine kobor on·timgiparang u·iataha.
Ia wa·al kamaoni badita noksan ong·atako man·aha aro maikai wa·al kamchakataha da·o dipet name talkujaenga ine ia koborko seatengmiting somoi West Garo Hills a·jani SP Vivekanand Singh Rathore parakataha.
Indake ong·genchimoba, ia dokkanrangko wa·al kamanio rasong gnange darangba janggirangko gimaatna gita nangjaha ine kobor on·aha.
