TURA: Mongolbar salo, Williamnagar-ni Loyola skulo poraienggipa chatrorangni bolrangko jitatengmiting somoio bilsi 14 ong·gipa chatro saksa boltong ga·akdapa man·e siangna nangahani gimin Garo Students Union (GSU) Eastern Zone, ia skulni dilgiparangko raken jegalataha aro ia skulni principal-ko kamoniko ra·galchina dabiangtokaha.
Mongolbar pringni 10:30 bajimango, ia skulni kal·chakramo dane donenggipa boltongrangko gipin biapona jitatchina gita ia skulo poraienggipa sak 25 chatrorangko ge·etani ja·man, boltong ge·sako adita sak chatrorang chile donatengmiting somoio maibakae ia boltong, Class IX-o poraienggipa Cherian M Sangma-o ga·akdapahachim aro uandaken ja·mano ua saknaanirangko man·e siangna gita nangahachim.
Indake ong·engon, ia skulni simsakgijani a·sel ia chatro janggitangko gimaatna nangahani gimin GSU-EZ-ni dilgiparang ia skulni dilgiparangko raken jegalataha aro ia skulni principal Melwyn Fernandes-ko kamoniko ra·galchina dabiangtokaha.
Sianggipa me·a bi·sana kalimaniko mesokna gita Budbar attamo dingtangmancha candle light service-ko Williamnagar DC office mikkango attam 5:30 bajioni ong·atanggen ineba GSU-EZ parakataha.
Sianggipa chatrona mande ra·pilskaani gita aro uni nokdangna bakrimaniko mesokna gita Williamnagar-o donggipa pilak skulrangkion Budbar salo chipe donchina gitaba GSU-EZ u·iataha.
