TURA: West Garo Hills a·jani Dalu jolrango wak jile cha·enggiparangna janggi tangani cholrangko tang·doatna gita Sombar salo, NABARD-ni dakchakanichi BAKDIL NGO-ni gita dingtangmancha Livelihood & Entreprise Development Program (LEDP)-ko Dalu-ni Bamonpara-o donggipa Bakdil Training Centre aro Krimkro FPO Centre-o ong·atangaha.
Ia program-ko ong·atanio South Garo Hills NABARD-ni District Development Manager Khelchandra Chongtham, Chokpot KVK-ni ning·o donggipa Livestock Production-ni SMS Dr Rupam Bhattacharya aro Veterinary department-ni official-rangba dongpae bak ra·angaha.
Ia jolrango wak jile cha·enggipa manderang, nambate wakrangko jilanichi an·tangtangna man·gnirangko bariatna man·na gita ia program-ko ong·atangaha.
