TURA: Williamnagar-o donggipa Loyola School-ni principal Father Melwyn Fernandes-ko Budbar sal dipet, North East-ni Education Council of Jesuit Society kam dontongataha ine kobor on·aha.
Re·anggipa Mongolbar salo, ia skulni kal·chakramo donggipa boltongrangko gipin biapona jitatchina gita chatrorangko ge·etani ja·man bilsi 14 ong·gipa Class IX-ni chatro saksao boltong ga·akdape ua sina nangahani gimin ia skulni principal-ko kam dontongataha.
Poraienggipa bi·sarangko iandake skulrango kam ka·ataniara niamni a·palo ong·achim indiba unsalo ia skulni principal, skulo poraienggipa adita sak chatrorangko, skulni kal·chakramo dane donenggipa boltongrangko gipin biapona apjitatchina aganaha aro rasong gribee ia me·a bi·sa, an·tangni ripengskarang baksa boltong ge·sako chile donatengmiting somoio boltong ga·akdapa man·e janggitangko gimaatna nangaha.
“East Garo Hills a·jani Dawagre-o donggipa Loyola School-ni chatro Cherian Bimik M Sangma-ni siani bidingo kobor man·soani ja·man North East India-ni Education Council of Jesuit Society, bakan inquiry-ko dakaha aro ia chatroni sianina ia skulni principal Fr Melwyn Fernandes-ko kam dontongataha. Iachi chinga sianggipa chatroni nokdangnaba chingni kalimpaaniko on·atna ska,” ine Jesuit Society-oni seachi parakataha.