SHILLONG: Shillong songjinmani Mawiong-o rikgipa Inter State Bus Terminus-ko re·baenggipa December jani gisepon chalaina man·gnok ine a·dokni gital Transport Minister Dasakhiatbha Lamare, an·tangni ka·dongchakenganiko parakataha.
Ia ISBT-ko re·anggipa July jaon, ma·mongni Union Home Minister Amit Shah, do·ga oe on·angahaoba da·onan ia ISBT-ko jakkalkujaengachim.
Indake ong·engon, ia ISBT-ko PWD (Roads), Transport department-na pakwate on·manaha indiba mitam lekkani kamrangko matchotkujaenga ine Lamare, kobor ra·timgiparangna parakataha.
“Bangki dongkuenggipa kamrangko matchotahaon, ia ISBT-o canteen, stall aro gipin biaprangko chalaina gita chinga tender-ko on·gnok,” ine Transport Minister parakataha.
Ia ISBT-oni bus garirangko watruraani bidingo janapatengon, ia ISBT-ko sorkarisa chalaigen aro gipin private company-rangna pakwate on·na miksonganirang dongja ine Transport Minister talataniko on·angaha.
Ia ISBT-ni kamrang da·o 98 percent-ni gitade matchotaha ineba Lamare parakataha.
“Ia ISBT-o bijolirangko sringani aro canteen-ni babilsiko tariani adita kamrang dongkuenga indiba kamrangko antignini gisepon matchotgen,” ine Transport Minister aganaha.
Ia ISBT-ko ta·raken chalaina man·na gita ua bakan ISBT-ona re·ange niegen ineba Lamare parakataha.
