TURA: Adita salrangna skang, Williamnagar-ni Loyola skulo bilsi 14 ong·gipa chatro saksa boltong ga·akdapa man·e siangani ja·man, ia skulni principal Father Melwyn Fernandes-ko police-rang rim·aha indiba ja·mano kacharini dongimin niamrango pangchake una jaminko on·e watpilaha.
Ia a·sel re·anggipa Mongolbar salo ong·ahachim aro ia a·sel ong·ani ja·mano sianggipa chatroni ma·a paa, ia principal-ni kosako Rongjeng-o FIR ka·aha aro ia principal an·tangba Budbar salo police station-ona re·ange an·tangko bame on·eani ja·man uko police-rang rim·ahachim.
“Ia skulni principal-ko Budbar salo rim·e judicial custody-o donataha. Ja·mano uamang kachario jaminna dorgastoko galaha aro kacharini dongimin niamrango pangchake una jaminko on·aha,” ine East Garo Hills a·jani Superintendent of Police (SP) Bruno A Sangma parakataha.
Re·anggipa Mongolbar salo, Loyola skulo principal-ni ge·etani gimin adita sak chatrorang, skulni kal·chakramo dane donenggipa boltongrangko gipin biapona apjitatengmiting somoio bilsi 14 ong·gipa Cherian Bimik M Sangma, boltong ga·akdapa man·e siangna gita nangahachim.
Indake ong·engon, Father Fernandes-na minggittam niamrango pangchake kachari jaminko on·aha ine kobor on·aha.
Koborko on·ani gitade, ua kacharini permission gri gipin biaprangchi re·ongkatna man·jawa, kachario hearing daka changantian ua dongpana nanggen aro kachario uko nanga changantian ua an·tangko mesokna man·na nanggen.
