TURA: Constitution-ni Sixth Schedule-ko taridapna gita ma·mong sorkarina ku·pattianiko on·anio name chanchichengesa ja·kuko de·china gita A·chik Holistic Awakening Movement (AHAM), a·dokni Chief Minister Conrad K Sangma-ko didiataha.
Iani bidingo Chief Minister-na sedoatengon, Sixth Schedule-ko taridapanio ‘unrepresented tribes’ kattako ra·galchina ma·mong sorkarina ku·pattianiko on·engani gimin AHAM-ni dilgiparang, Chief Minister-ko mittelpilataha indiba Sixth Schedule-o village council-ko ra·gatchina ku·pattianiara chengonin A·chik songrango jakkalbaenggipa daka rikaniko aro Nokmarangna on·gimin bilrangko pe·galani gita ong·gen ine mikrakataniko on·angaha.
“Sixth Schedule-ara a·brirango songdongenggipa Tribal-rangko chel·chakna on·gimin niam ong·a indiba ia niamko taridapanio village council-ko ra·gatgenchimode A·chikrangni chengoni ja·rikbaenggipa niamrangko pe·ani gita ong·gen,” ine AHAM-ni vice president George Prince Ch Momin parakataha.
Momin-ni parakatani gitade, chengonin chonchongipa jatrangko dal·batgipa jatrangni kragija jakkalaniko ma·siani giminsa Indian Constitution-ko segatgipa manderang, Assam, Meghalaya, Tripura aro Mizoram a·dokrango songdongenggipa Tribal-rangko chel·chakna Sixth Schedule-ko on·ahachim.
GHADC-na ma·mong sorkarini dakchake on·aniko jegalenga ong·ja indiba jatna aro jatko dilenggipa Nokmarangna on·gimin bilrangko pe·anikode ra·chakna man·jawa ineba AHAM parakataha.
Sixth Schedule-ko taridapna ku·pattianiko on·anio A·chikrangni nangnikani gita ong·jagenchimode mikkangchi AHAM-ba Nokmarang aro dingtang dingtang dolrang baksa bakrime jegalanirangko dakanggen ineba Momin mikrakataniko on·angaha.