SHILLONG: Re·anggipa August 10 tariko Shillong songjinmani Laitumkhrah bajaro IED boma gopretatanio jak donggipa sakgittam manderangko police rim·dapaha ine Police aganaha, je a·sel ong·anion sakgni manderang saknaatako man·ahachim.
Hynniewtrep National Liberation Council (HNLC) bobil dolni bame on·gimin saksako man·chape, da·o sakgittam rim·dapgipako chanede, a·sel ong·atani mamlao jak donggiparangko rim·a man·a gimikchi sakbri ong·engaha ineba police aganaha.
Rim·a man·gipa manderangara HNLC bobil doloni bame on·gipa Kitbok Sohklet alias Franko aro, Sufiyan Ali Hazarika alias Manbalang Jyrwa aro Gary S Myrboh mang ong·a.
Jyrwa, jekon Facebook gita bobil dolni publicity secretary, Sainkupar Nongtraw-ni palo kamrangko ka·ani gimin, January 2013-oba rim·ahachim.
HNLC-ni gitcham General Secretary, Cheristerfield Thangkhiew, jean IED gopretatanio mongsonggipa jak donggipa ine matnangako man·gipa ong·achim, ua August 13 tariko uni dongchakramon police-ni jako goa man·e siangaha.
Thangkhiew-ni siani a·selko a·dok sorkari, judicial inquiry-ko dakatenga.
