SHILLONG: A·dok ning·o chel·chakanirangko on·ani kamrangko nipiltaina gita Congress dol didiahani gimin State Security Commission-ni tom·aniko Mongolbar salo ong·atna tik ka·aha.
Meghalaya a·doko so·sojengjeng ong·anirangko nikna man·rongengani gimin aro mongsongbate bobil dake chakatgipa dolrangko bikottaina jotton ka·anirangko nikna man·engani gimin Security Commission-ni tom·aniko ong·ate, a·doko chel·chakani kamrangko nipiltaichina Opposition dolni dilgipa Mukul Sangma didiengachim ine nikna man·a.
Batanggimin sal somoirango a·doko bobil dake chakatgipa dolrangko bikottaina jotton ka·anirangko aro dingtang dingtang biaprango boma gopretani aro ma·manti silchidarerangko man·rongengani gimin Opposition Congress dol, a·doko chel·chakgipa dolrangni kamko nipiltaina nangnike ia State Security Commission-ni tom·aniko ong·atchina changni chang sorkariko didiengachim.
Indake ong·engon, a·doko bobil dake chakatanirangko champengsona gita SSC-ni tom·anio, nangchongmota u·iatanirangko man·gen ine Congress dol ka·dongchakenganiko parakataha.
Iana skang, BJP-ni MLA AL Hek-ba a·doko bobil dake chakatanirangko champengsona gita SSC-ni tom·aniko ong·ate apsan chanchirimchina gita didiangahachim.
Garo Hills-o badiaba badiaba bobil dake chakatgipa dolrang tangchabapiltaina jotton ka·enga aro sorkari iani bidingo mikrake kamko ka·sona nangenga ine Mukul Sangma-ni aganani gitan BJP MLA-ba apsan nangnikaniko parakahachim.