SHILLONG: Seniority ba a·gipi ong·e kam ka·aniko nigrikenba, da·o ong·enggipa Chief Secretary, MS Rao-ni da·o September 30 tariko kamoni neng·takani ja·mande, Rebecca Vanessa Suchiang-an Meghalaya-ni gital chief secretary ong·nasienga.
Sorkarini koboro parakani gitade, a·doko da·o dipetode uan a·gipibatsranggipa IAS officer ong·enga, RV Suchiang-ko gital CS-na seokanio maming jegrikani dongja.
Koboro indakeba paraka je RV Suchiang-ni ja·man sakgipin a·gipibatgipa IAS officer-de Pankaj Jain ong·achim, jean 1990 batch-ni IAS officer ong·a, indiba ua Meghalayaona re·bapiljawahakon, maina ua da·omitingo Union Finance Ministry-o Additional Secretary ong·enga. Ritingo dongenggipa sakgipinara Additional Chief Secretary, DP Wahlang ong·enga, jean 1993 batch-ni ong·a.
Indake ong·genchimoba, sakomancha gital chief secretary-na seokgen uani bidingo Chief Minister, Conrad Sangma talatkujaenga. Gitalgipa chief secretary-ko somoi gitan seokgen inesan Pa Sangma aganengkua.
Suchiang, jean da·omitingo Additional Chief Secretary ong·e, Personnel & A.R. Cabinet Affairs, Finance, Home (Police), Political, Home (Passport), Home (CD&HG), Ex-Officio Director General, MATI and Chairman-cum-MD, MeECL department-rangko nirokenga.
RV Suchiang, Assam-Meghalaya cadre-ni 1989 batch-ni ong·a.
