SHILLONG: National Institute of Technology Meghalaya (NITM)-ni changchetgipa Convocation-ko ong·atanio Shillong Chamber Choir-ni dilgipa Neil Herbert Nongkynrih-na Ph.D degree-ko on·e mande ra·pilskaaniko dakanggen.
NITM-ni changchetgipa Convocation-ko ong·atanio sak 19 Ph.D, sak 34 M.Tech, sak 37 M.Sc aro sak 124 B.Tech chatro chatrirangna degree-rangko on·angan baksana Shillong Chamber Choir-ni dilgipa Neil Herbert Nongkynrih-na Ph.D Degree-ko on·e mande ra·pilskaaniko dakanggen ine u·iataha.
Koborko on·ani gitade, NITM-ni Convocation-ko online gita ong·atanio a·songni Union Education Minister Dharmendra Pradhan, mongsonggipa sokgipa ong·e bakko ra·anggen.
Ia NITM-ko 2010 bilsio Parliament-ni NIT Act 2007-o pangchake India sorkarini Education Ministry-ni dakchakanichi a·bachengatahachim aro ia institute-ko a·bachengatani somoio Shillong-o temporary campus dake a·bachengahaoba da·o ia institute-na permanent campus-ko Sohra-o rikengahachim. Ia NITM-o da·o dipet Computer Science & Engineering, Electronics & Communication Engineering, Electrical Engineering, Civil Engineering aro Mechanical Engineering-o B.Tech aro M.Tech baksana Physics, Chemistry aro Mathematic-o M.Sc course-rangko aro Engineering, Sciences, Mathematics aro Humanities-o Ph.D program-rangkoba on·enga.