SHILLONG: Meghalaya a·doko State Security Commission (SSC)-ni tom·aniko bilsi gittamni ja·man Budbar salosa ong·attaiahani gimin ia tom·aniko jagittamprakon ong·atchina gita Opposition Congress dolni dilgipa aro SSC-ni membor Mukul Sangma didiangaha.
State Security Commission tom·ani ja·man kobor ra·timgipa manderang baksa agangrikengon, niam gitade SSC-ni tom·aniko bilsigittamprakon ong·atna nangachim ine Sangma aganaha.
“Uni gimin niamo pangchake SSC-ni tom·aniko somoi gita ong·atjringna nanga,” ine Sangma aganaha.
Ia commission-ni independent seat damgni bangbang ong·e dongengoba da·onan sorkari, commission-ni membor-rangko songe on·kujaenga ineba Congress Legislature Party (CLP)-ni dilgipa matnangataha.
Sangma-ni aganani gitade, a·doko songdongenggipa manderangna naljokaniko on·na aro gipin biaprangoni napdrabaanirangko chel·chakna gita police-rangan mongsonggipa kamrangko ka·gipa ong·ani gimin ia commission, police officer-rangko kamo donatanikoba nirokna nangenga.
Bame on·gimin bobil dolni manderang silchidarerangko kepiltaina jotton ka·enga ine intelligence-oni koborrangko on·engani giminba ua an·tangni jajrengchakaniko parakangaha.
“Gipin a·dokrango bobil dake chakatgipa manderangna Meghalaya a·dokon skie on·chakronga ine skangonin ma·sitokani gimin sorkari, iako olgroke ra·na gita nangja aro mikrake kamko ka·sona nangenga,” ine Sangma aganaha.
