SHILLONG: Bristibar salo Meghalaya a·dokni gitcham Chief Secretary MS Rao, kamtangoni neng·takangani ja·man, uni biapko Rebecca Suchiang ra·rikskaaha.
Rebecca Suchiang, Tribal-rangoni skanggipa me·chik Chief Secretary-ba ong·aha aro 1980 bilsirango me·chik Chief Secretary ong·angipa PP Trivedi-ni ja·man ua me·chikrangoni gnigipa Chief Secretary-ba ong·aha.
Kamtangko jako ra·angani ja·man, kobor ra·timgipa manderang baksa agangrikengon, Tribal me·chikrangoni skanggipa Chief Secretary ong·na man·ahani gimin ua kusi ong·a indiba mikkangchi bang·a Tribal-rang, dal·dalgipa officer-rang ong·angtokgen ine Suchiang, an·tangni kusi ong·aniko aro ka·dongchakenganiko parakangaha.
Chief Secretary ong·e uni skanggipa daitoara mai ong·gen ine sing·on, Meghalaya a·doko lekka porani gita namen komiengani gimin ua suk ong·ja aro lekka poraniko namdapatanian uni mongsonggipa daito ong·gen ine Suchiang aganaha.
“Chief Secretary ong·e angni dakna nanggni kamrang namen bang·gnok indiba anga a·doko lekka porako tang·doatna skani donga aro iako anga gisiko nange jako ra·gen. Kamrangko chu·sokatanio anga dingtang dingtang ra·bianirangko chagronggen ine anga ma·sienga indiba angbaksa kam ka·rimgiparang aro dingtang dingtang officer-rangni bakrimanichi anga ia kamrangko chu·sokatna ka·dongenga,” ine Suchiang aganaha.
A·dokni Chief Secretary ong·na skang ua MeECL-oba Chairman-cum-Managing Director (CMD) ong·ahachim aro uandaken ua MeECL-o dingtanganiko ra·bana gita nangnikenga ineba Suchiang aganaha.
A·doko an·seng baljokani kamrangko namdapatani gimin janapatengon, mikkangchi sanna banani kamrangko nambate ka·na man·na gita Health department-na koros ka·aniko bariatna nanggen ine gital Chief Secretary parakataha.
Skango jekai ua kamrangko rake ka·achim apsan daken da·o Chief Secretary ong·ani ja·manoba ua kamrangko raken ka·angkugen aro officer-rangkoba kamtangtangko nambate ka·china didigen ineba Suchiang aganaha.
Meghalaya aro Assam a·dokni simarango ong·enggipa obostarangni bidingo sing·on, iani bidingo da·o a·dok damgni agangrikengaha aro committee-rang report-rangko on·manahaon, nanga gita kamrangko ka·angna man·gnok ine gital Chief Secretary parakataha.
Meghalaya a·doko so·sojengjeng ong·anirangko ua man·a dipet champengna jotton ka·gen ineba Suchiang aganaha.
