TURA: Tura-oni Shillong-ona re·angenggipa Meghalaya Transport Corporation (MTC) bus gari, Bristibar pringwalo Nongchram-o donggipa Ringdi chiringona ga·akonange a·sel ong·aha aro ia a·sel ong·anio sak 6 manderang janggitangtangko gimaatna nangan baksana gipin sak 16 manderang bilongbee saknaanirangko man·na nangtokaha.
East Garo Hills a·jani Superintendent of Police (SP) Bruno A Sangma-ni kobor ra·timgiparangna parakatani gitade, gari a·sel ong·ani ja·man walni bakon mande sakbrini manggisikode ra·ongkatna man·aha indiba sakgnini manggisikode Bristibar salo crane-rangchi bus gariko ra·doani ja·mansa nikaha.
Ia bus gario songreanggipa manderangoni saksade da·oba gimakuenga aro uko police-rang, chiringrangoniko sandikuenga ineba SP parakataha.
Sangma-ni parakatani gitade, ia bus gari ta·rakdugae re·angesa Ringdi dolongko su·gakeaha aro ja·mano chiringona ga·akonangaha.
Ia bus gariko saltimgipa aro garini handyman sakgnian siaha ine parakatengon, driver-ni manggisiko post mortem ka·engmiting somoio ua chu ringama ringjachim, uni an·chiko porikka ra·e nijolgen ine Sangma parakataha.
Ia bus gari Tura-oni re·chakatangengmiting somoion gario mande gapachim aro gario songreangenggipa manderangni bimingko see rakkiani gitade ia gario gimik sak 21 manderang, Williamnagar aro Tura-oni songreangengachim.
Shillong-ona songreangenggipa sak 21 manderangoni sak 9-de Tura-oni aro sak 12-de Williamnagar-oni songreangengachim.
Bristibar pringwalo bus gari ga·akonako knasoa bakan Nongchram songni manderang rikbae, saknaa man·gipa manderangko ra·ongkatna dakchakaha aro saknaa man·gipa manderangko Rongjeng hospital-ona ra·angchengenba ja·mano Williamnagar aro Tura civil hospital-ona ra·baaha.
Ia gari a·sel ong·ani somoio bang·bata manderang tusipekmiting ong·enba janggirangko gimaatna aro bilongbee saknaanirangko man·tokna nangaha ineba mitam kobor on·timgiparang u·iataha.
Ia gari a·sel ong·anio sianggipa sakdok manderangara, Williamnagar Rangmal Badim-oni bilsi 26 ong·gipa Dismi M Sangma, Damra Laskarpara-oni Sengsrang R Marak, Williamnagar Bolkinggre-oni bilsi 23 ong·gipa Traiwin R Marak, Williamnagar Old PWD Colony-oni Tengsimbirth M Sangma, Williamnagar Balsrigittim-oni bilsi 18 ong·gipa Chekamchi G Momin aro East Khasi Hills a·jao donggipa Umphyrnai-oni bilsi 45 ong·gipa Everestar Kharumnuid ong·a.
Bristibar pringwalo Nongchramo a·sel ong·gipa bus gari.