TURA: Re·anggipa Budbar walo, Tura aro Williamnagar-oni Shillong-ona manderangko salangengmiting somoio Nongchram dolongo MTC bus gari a·sel ong·e sianggipa manderangna Garo Hills-ni dingtang dingtang dolrang kalimpaaniko parakattokaha.
Ia gari a·sel ong·anio sianggipa manderangna Association for Democracy & Empowerment (ADE) dolni gita kalimpaaniko parakatengon, a·sel ong·anio saknaa man·gipa manderangba ta·raken nampilchina ine an·tangtangni skaniko parakattokaha.
“Gario songregipa manderangni parakani gitade, garini driver, handyman aro conductor-rang pilakan chu ringaha aro uamang gariko nangana bate ta·rakdugae salangahani a·sel ia gari a·sel ong·na nangaha. Gariko saltimgiparangan bus gario songregiparangna simsakna nangani ong·achim indiba uamang churangko ringesa maming simsakani gri iandakgipa a·selko ong·ataha. Uni gimin iandakgipa manderangko MTC-o rakkina nangja,” ine ADE-ni general secretary Supam R Marak parakataha.
Da·ororo ramarang nambatahani gimin Tura-oni Shillong-ona re·na gita batbewal konta 6 ba konta 7-mangkosan nangaia aro night bus-rangko nangchongmota ong·jaha ine janapatengon, mikkangchi iandakgipa a·selrangko champengna gita night bus-rangni pal day bus ba salni gariko watskaode nambatgen ine ADE, MTC-ni dilgiparangna ku·pattianiko on·angaha.
Indake ong·engon, ia gari a·sel ong·anio sianggipa manderangni nokdangrangna Hundred Drums Wangala Festival Committee-ni gitaba kalimpaaniko parakataha.
