SHILLONG: Nongchram-o MTC bus gari a·sel ong·e mande sidamani ja·mano, a·doko chu peke public bus garirangko salgipa driver-rangko a·dok sorkarini chek ka·na simsakjani gimin NCP state president, Saleng Sangma, sorkarini kosako matnangaha.
“An·ching sorkari ong·e daito ra·gipa ong·na nanga aro indakgipa kamrangko sorkari nirokatgenchimode haida indakgipa a·selrang ong·jawachimkon,’’ Pa Sangma gisiko ding·chaoe aganaha.
Indakgipa a·sel skangoba ia apsan ramaon ong·aha ine janape aganengon, public gari aro bus-rangko salgipa driver-rangko chekjani gimin ba nirokatjani gimin Pa Sangma, Sorkario sing·doaha.
Sildorengrangko salna skang pilak pilot-rangko chek ka·chenga ine mesoke aganengon, Meghalayaode public garirangko salgiparangko maming chek ka·ani dongja ineba Pa Sangma sikkime aganaha.
Pa Sangma agana, Secretariat-o uni an·tangni driver-an pekgipasa aro a·sel ong·na am·aba dongaha, unigimin publice gari aro bus-rangko salgipa driver-rangko chek ka·china ua Sorkarina raken seatgen, maina manderangni janggi uamangni jakon ga·aka, Pa Sangma agandapaha.
Re·anggipa adita salrangna skang mangmangoba West Garo Hills-ni Purakhasiao trak bolsa bi·sa saksako salpake siataha. Adita politician aro bading chiwalgiparangni a·sel manderang gimaaniona sokna nangja, NCP MLA aganaha.
Chu peke gari salgiparangni kosako bang·e dai gamatna nanga, uamangni license-rangko ra·galna nanga aro uamangna janggi tanga gimikon gari saltaina on·na nangja, Pa Sangma aganaha.
Gari a·sel ong·gipani bidingo inquiry-ko dakchina Deborah dabia:
Bang·a changon gariko saltimgiparang chu peke garirangko salengani a·sel ramram manderangsa janggirangko gimaatna nangenga ine Williamnagar-ni gitcham MLA aro gitcham Congress Minister Deborah C Marak parakatenba, Budbar walo Shillong-ona re·angenggipa MTC bus gari a·sel ong·gipani bidingo jakgitele am·sandianiko dakchina Meghalaya sorkario dabiangaha.
“Gariko saltimgipa mandeni chu ringe gariko salani a·sel da·alo bang·a nokdangrang chaktopilgijagipa dukko chakna nangenga. Ian gital katta ong·ja maina ru·uta bilsirangonin manderangko salruragipa bus garini driver-rang iandake churangko ringe salenga. MTC-ko salgiparang churangko ringe salenga ine ma·sigenchimoba sorkari maming ja·kurangko de·jani a·sel dal·begipa a·selko chagrongna nangao ga·akaha,” ine Marak parakataha.
Gari a·sel ong·anio sianggipa aro saknaa man·gipa manderangna compensation-rangko on·ani bidingo sorkari mamingkoba parakkujaengani giminba ua a·dok sorkariko sing·doangaha.
“Ia a·sel ong·anio bilongbee saknaanirangko man·e janggitangtangna dakgrikenggipa manderangko Guwahati, Goalpara aro Tura hospital-rangona ra·angaha. Sawa uamangni sanna banani korosrangko on·gen?” ine Marak sing·doangaha.
MTC-ko chalaianio maming nirok sandianirang dongjani a·sel gariko saltimgiparang skatang aro churangko ringe salna man·enga ine Marak, Transport department-koba matnangataha.
“MTC bus gari bolsaan Williamnagar-oniko manderangko gatani ja·man Tura-onikoba gatengkua aro uni ja·mansa Shillong-ona re·angenga. Maini gimin MTC bus garirangko aro gari salgipa driver-rangko chu·onga gita on·na man·jaenga?” ine Williamnagar-ni gitcham MLA, Transport department-ko sing·doangaha.
Transport department-ni kamrangko namdapatna man·kujaskal, MTC bus garini walo salruraaniko dontongatchengna nanga maina ian manderangni janggina namen kenna nangani ong·enga ineba Marak parakataha.
