SHILLONG: Bristibar saloni Sukrobar salona konta 24-ni gisepo Meghalaya a·dok gimiko sak 155 manderang COVID-19 man·daptaiaha indiba ia konta 24-ni gisepo a·dokni pilak biaprangon COVID man·e sigiparang dongskajaha.
Konta 24-ni gisepo COVID-19 man·dapgipa sak 155 manderangko channe da·o Meghalaya a·dok gimiko COVID-19 man·e dongenggiparang gimik sak 1666 gapaha aro da·o dipet a·dok gimiko COVID man·e sianggiparangara gimik sak 1404 gapskaengaha.
Konta 24-ni gisepo COVID man·gipa sak 155 manderangoni, sak 90-de East Khasi Hills-o, sak 3-de Ri Bhoi a·jao, sak 1-de South Garo Hills-o, sak 2-de South West Garo Hills-o, sak 3-de South West Khasi Hills-o, sak 3-de West Garo Hills-o, sak 26-de West Khasi Hills-o aro sak 27-de West Jaintia Hills a·jao ong·a.
Ia apsan salon gimik sak 108 manderangde Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 78,375 gapskaengaha.