TURA: South West Garo Hills a·jaoba antio changprak cha·gipa bazar-rangko kulipiltaina on·engahani gimin iandakgipa bazar antirangna District Administration, dingtangmancha niamrangko donataha.
South West Garo Hills a·jani Deputy Commissioner Ch Ramakrishna-ni u·iatani gitade, antio changprak cha·gipa bazar-rango dokkan dakenggiparang, an·tangtangni tika su·a su·kugijaniko seenba tape donna nanggen aro dokkanrangko komibeoba metre 2 che·grike donna nanggen.
Bazar antio dokkan dakenggipa ba bading chiwalenggipa pilak manderangan mask-rangko ganna nanggen aro COVID-19-ni niamrangko ja·rikna nanggen.
Gipin a·dokrangoni re·bae badingenggipa ba koros ka·enggipa manderang pilakan Health department-ni dongimin niamrangko ja·rikna nanggen.
Bazar antirango me·su samjak aro uandakgipa bosturangko palna sim·na man·gen indiba plastic, electronic, second hand ba·rarang aro uandakgipa bosturangko palna sim·na man·jawa.
Bazar anti cha·aniko bazar committee-tangtangni president aro secretary-rang name nirokna nanggen aro COVID-ni niamrangko pe·jana gita raken nirokna nanggen ine DC u·iataha.
Ia niamrangko pe·genchimode niam pe·gipani kosako district administration rakgipa ja·kurangko de·anggen ineba Deputy Commissioner, mikrakataniko on·angaha.