AMPATI: Re·anggipa October-ni 2 tariko a·song gimikon Mahatma Gandhi-ni atchiani salko manitokengon, South West Garo Hills a·jaoba ia salko maniani bak gita Swachhta Hi Seva Campaign-ko matchotatna Swachhta Bharat Diwas-ko ong·atangaha. Ia Swachhta Hi Seva Campaign-ko a·jani Swachh Bharat Mission (G), re·anggipa September 15 tarikonin a·jani dingtang dingtang biaprango program-rangko ong·atangahachim.
Ia salo dingtangmancha program-ko Ampati-ni Multi Facility Centre-o ong·atangaha aro ia program-ko ong·atanio SWGH a·jani Deputy Commissioner aro SBM-ni Chairman Ch Ramakrishna baksana Ampati-ni EE (PHE) aro SBM-ni Member Secretary aro dingtang dingtang officer-rangba bakko ra·angaha.
Ia antignina program-ko ong·atanio manderangna rongtal an·tale dongani bidingo agan-skie on·na gita Swachhgraha Rath Yatra, Shramdaan, Swachhta campaign aro uandakgipa program-rangko ong·atangahachim.
Ia program-ko ong·atanio SWGH a·jani dam 45 songni Village Water & Sanitation Committee (VWSC)-rangna, uamangni Swachhta campaign-ko gisik nange bakko ra·ahani gimin boksis aro certificate-rangko uamangni secretary aro president-rangni jako on·angaha.
Ia bilsini Swachhta Pakhwada 2021-ko maniani bak gita SWGH a·jani Deputy Commissioner, Ampati Civil Hospital-ni wilwilao dingtangmancha bolrangko ge·dilangan baksa rongtal an·talatanikoba dakdilangaha aro iano Hospital-ni Medical Superintendent Dr JS Momin baksana doctor-rang, hospital-o kam ka·giparang aro chatro chatrirangba bakko ra·angaha.
