Assam aro M’laya-ni simarango meligrikna man·jaenggipa biaprango dolgnini dilgiparang niea

BOKO: Assam aro Meghalaya a·dok damgnini simarango meligrikna man·jaenggipa songrangko a·dok damgnini dilgiparang, Sombar salo re·ange nieaha.
Assam-ni dilgiparangko Assam-ni Agriculture Minister Atul Bora dilangaha aro Meghalaya a·dokni dilgiparangko PHE Minister Renikton Lyngdoh Tongkhar dilangskaaha.
A·dok damgnini dilgiparang, Boko constituency-ni ning·o donggipa dingtang dingtang songrangona re·ange, songni manderang baksa agangrikangaha.
A·dok damgnini dilgiparang, Hahim, Athiabari, Aradonga, Salbari, Malchapara, Gamerimura, Gohanimara aro Gizang songrangona re·ange, songni manderang baksa uamangni nangnikani aro dingtang dingtang neng·nikanirangko sing·e ra·baaha.
A·dok damgnini dilgiparang, ia songrangona re·ange nieanio ia jolrango donggipa All Rabha Students Union (ARSU), Garo Students Union (GSU), Rabha Women Council, Garo Women Council aro uandakgipa dingtang dingtang dolrang, uamangko rimchaksotokaha aro an·tangtangni neng·nikanirangko ta·rake namatchina gita a·dok damgnini dilgiparangko didiangaha.
Ia songrangko nieani ja·man, kobor ra·timgipa manderang baksa agangrikengon, a·dok damgnini simarango meligrikgijaniko namatna gita Assam a·dokni Chief Minister Himanta Biswa Sarma-ni dilanichi Assam sorkari, rake kamrangko ka·enga ine Assam-ni Minister Atul Bora parakataha.
Meghalaya a·dokni Chief Minister baksa iani bidingo tom·e chanchirimani ja·man ia neng·nikanirangko namatna gita kamrangko ka·dilna Assam sorkarini gitaba regional committee-rangko songaha ineba Bora aganaha.
A·dok damgnini simarango meligrikgijanirangko namatna gita uamang songni manderang baksa agangrike, uamangni agan-ku·pattianirangkoba ra·enga ineba Assam Minister aganaha.
Iani bidingo da·o regional committee-rang survey-ko ka·engaha aro survey ka·ako matchotahaon report-ko a·dok damgnini chief minister-rangna on·atgnok ineba Bora aganaha.
Iani bidingo Meghalaya a·dokni Cabinet Minisetr Renikton Lyngdoh Tongkhar-ba kobor ra·timgiparangna talatangengon, uamang skanggipa changna Assam-ni dilgiparang baksa ia songrangko nieaha aro uamang ta·raken ia jolrango man·enggipa neng·nikanirangko namatna jotton ka·enga ine parakataha.
A·dok damgnini simarango ru·uta bilsirangonin meligrikna man·jaengani gimin a·dok damgnini sorkarirangan ia neng·nikaniko namatna kang·kare kaenga ineba Tongkhar aganaha.
Ia biaprangko nieani somoio Meghalaya a·dokoni re·angpagipa gipin dilgiparangara, Mawshynrut-ni MLA Gigur Myrthong, Rambrai-Jyrngam-ni MLA Kimfa Sidney Marbaniang, West Khasi Hills a·jani Deputy Commissioner Timberland Lyngwa, SP G Lyngdoh aro gipinrang ong·a. Assam-oni re·anggipa gipin dilgiparangara, Kamrup-ni DC Kailash Kartik N, SP Hitesh Ch Roy, Boko-ni gitcham MLA Jyoti Prasad Das aro gipinrang ong·skaa.