TURA: Raksamgre Civil Sub-Division-ni ning·o Pedaldoba-oni Raksamgre-ona Photomati gita dakanggipa ramako ta·raken tarie on·china gita Garoland State Movement Committee (GSMC) Pedaldoba regional unit dabiangaha.
Iani bidingo a·dokni PWD Minister Prestone Tynsong-na sedoatengon, ia ramara Raksamgre Civil Sub-Division-ni ning·o donggipa dingtang dingtang songni manderangna namen nangchongmotgipa rama ong·achim aro ia rama da·o namsrangjahani a·sel manderang re·a doanio namen neng·nikanirangko man·tokna nangenga ine GSMC Pedaldoba regional unit-ni chairman Rimjen Ch Sangma parakataha.
“Ia ramaan Tikrikilla C&RD Block aro Raksamgre sub-division-ko nangdimatgipa mongsonggipa rama ong·a indiba ia rama namsrangjaengahani a·sel manderang salanti re·a doanio neng·nikanirangko chagrongna nangtokenga,” ine GSMC Pedaldoba unit-ni chairman parakataha.
GSMC Pedaldoba unit-ni parakatani gitade, ia apsan ramaan Borjhora-oni Bajengdoba ramako nangdimeatgipa ramaba ong·achim aro Medhipara NEC ramaoni Assam ramao nangdimegipa ramaba ong·ani gimin ia ramara pilakni gitan namen nangchongmotgipa rama ong·a.
“Ia ramako indita bilsirangna tarigija donengani a·sel, salanti office re·enggipa aro skulrangchi re·enggipa bi·sarangba neng·nikanirangko chagrongna nangtokenga. Uni gimin ia jolo songdongenggipa manderangni namgnina ia ramako ta·raken taripile on·china chinga mol·molenga,” ine GSMC Pedaldoba unit-ni chairman, PWD Minister-na sedoatgipa chittio janapataha.
