SHILLONG: Re·baenggipa October-ni 30 tariko ong·atna sienggipa Mawphlang Assembly constituency-ni by-election-na National People’s Party (NPP)-ni tikitko Lamphrang Blah-na on·aha ine Mongolbar salo NPP-ni dilgiparang parakataha.
Mawphlang Assembly constituency-ni by-election-koba re·baenggipa October 30 tariko Mawryngkneng constituency aro Rajabala constituency baksa apsan ong·atengachim ine nikna man·a.
Mawryngkneng constituency aro Rajabala Assembly constituency-ni by-election-rango susana gitade adita salrangna skangan NPP-ni candidate-rangko seokmanahachim.
Mawryngkneng Assembly by-election-na Pyniaid Sing Syiem-ko aro Rajabala Assembly by-election-na Abdus Saleh-ko NPP-ni candidate dake seokmanahachim.
Ia damgittam Assembly constituency-ni by-election-ko October 30 tariko ong·atenba, by-election-ni result-rangko November 2 tariko parakskana siengachim.
Indake ong·engon, ia damgittam Assembly by-election-rangon NPP chegipa ong·gen ine adita salrangna skangsan NPP-ni state president aro Rajya Sabha-ni MP WR Kharlukhi, an·tangni ka·dongsoenganiko parakatahachim.