SHILLONG: National People’s Party (NPP)-o napna miksongenggipa manderangko ka·mikkenatani gimin Mongolbar salo NPP-ni vice president aro Meghalaya a·dokni Deputy Chief Minister Prestone Tynsong, Hynniewtrep National Liberation Council (HNLC) bobil dolni kamko jegalataha.
“NPP-na kam ka·giparangko aro dilgiparangko ka·mikkenatenga ine koborrango seanirangko niksoe anga namen suk ong·jaha. Iandakgipa somoio NPP-na ka·mikkenataniko on·ahani gimin anga ka·mikkenatgipa manderangko sing·dona ska,” ine Mongolbar salo, Mawphlang-ni Congress MDC Lamphrang Blah-ko NPP-ona rimchaksona gita Mawphlang-o tom·aniko ong·atanio Tynsong aganaha. Ia tom·anio NPP-ni national president Conrad K Sangma, NPP-ni state president WR Kharlukhi aro gipin dilgiparangba dongpae bakko ra·angahachim.
Mitam manderang, NPP-ni dal·roroaniko aro Delhi-o national politics-o susana chol man·paaniko nikna sikgijagiparangba donga ineba NPP-ni vice president aganaha.
“Bang·a manderangan NPP-ko iandakgipa gadangona sokatna siktokjaenga,” ine ua aganaha.
Maini gimin ia dolrang, NPP-ni national president Conrad K Sangma-an a·dokni Chief Minister-ba ong·enga ine rasong chana man·jaenga ineba ua sing·doangaha.
Badiaba dolrangni iandake ka·mikkenatanirangko on·ani a·selan NPP-na kam ka·enggiparang aro dilgiparangni gisepo kenjagokataniko on·enga ineba Tynsong parakataha.
“Uni gimin iandake ka·mikkenatanirangna kengija anga manderangko NPP-o napchina aro a·dokna aro a·doko songdongenggipa manderangni namgnina kamko ka·china anga didienga,” ine NPP-ni vice president parakataha.