TURA: Re·baenggipa October-ni 30 tariko ong·atna sienggipa Rajabala Assembly Constituency-ni by-election-o Bharatiya Janata Party (BJP) dolba susana gita candidate-ko parakmanahani gimin ia Rajabala constituency-ni by-election-o susagipa candidate-rang bang·naba gnang ine niksamsona man·enga.
Ia Rajabala by-election-na BJP dolni district vice president Kingstone B Marak-ko Sombar salon, candidate-na parakatmanahachim aro da·o ia by-election-na Congress aro NPP baksana BJP dolba candidate-ko minge donsomanaha.
Rajabala by-election-na Congress dolni tikitko sianggipa MLA Dr Azad Zaman sagini jikgipa Hasina Yasmin Mondal-na on·aha ine parakatani ja·man da·o Rajabala-ni Congress MDC ong·enggipa Ashahel D Shira-ba, an·tangna tikitko on·jahani gimin suk ong·gijaniko parakatskaaha.
“Angna chakenggipa manderang angko ia by-election-o susachina nangniktokengani gimin angaba Congress dolni tikitna senge dongpaengachim aro anga CLP-ni dilgipa Mukul Sangma-ni aganchakanina senge dongkuenga,” ine Shira parakataha.
Rajabala-ni da·o MDC ong·enggipa Ashahel D Shira, ia apsan constituency-on MLA-ba ong·ahachim aro ia by-election-o ua Congress tikitko man·rikjagenchimoba, Independent candidate ong·e susaskanaba gnang ine niksamsona man·enga.
Ia chang Rajabala by-election-o susana miksongenggiparangoni Shira baksana sakgipin Karan Singh Sangma minggipa mandeba susana sienga ine koborrangko man·soaha aro uaba ia by-election-o susana gita kamrangko ka·soengaha ine kobor on·aha.
Rajabala by-election-o susana sienggipa Congress, NPP, BJP aro Independent candidate-rang baksana United Democratic Party (UDP) dolba cholrangko nienga aro iana uamang candidate-ko sandienga ine kobor on·timgiparang u·iataha.
Koborko on·ani gitade, Rajabala by-election-o susana gita Garo Hills-ni dilgiparang baksa chanchirimna UDP-ni president Metbah Lyngdoh, Garo Hills-ona re·baenga.