SHILLONG: Indiani Jharkhand A·doko bobil dake chakatgipa Maoist bobil dolni kosako batanggimin 2018 July 6 tariko, operation ka·mitingo bobil dolchi chadrapa man·e sianggipa CRPF Force, Uni service No. 115135344. CT/GD of 209 COBRA-ni sipai Late Utpal Rabha-ni sianiko mijalo gisik ra·enba una mandera·aniko dakangaha.
Sianggipa Rabha-ko mijalo Thorikhapara, Bajengdobao gisik ra·aniko dakaniona Turani CRPF 120 Battalion Officials-rang re·baaha. Rabha-ko gisik ra·na tom·aniko dakanio North Garo Hills-ni DC RP Marak mongsonggipa sokgipa ong·aha aro BR Khundu MPS Addl. SP North Garo Hills, Smt. Ripamchi N Sangma MCS, BDO Bajengdoba North Garo Hills mangba dongpaaha.
Rabha-ni atchichakram biapo Bharatya Salami-ko dake pulrangko done mandera·ani dakangaha. Tom·anio songni nokni dilgiparang aro manderangba bakko ra·angaha.
Tom·anio aganprakengon, CRPF ba ugita dakgipa chelchakgipa dolni kamrango napangna gita gisiko nangchina mongsonggipa sokgipa RP Marak, a·jolni chadamberangna didianiko on·angaha.
