TURA: Garo Hills Autonomous District Council (GHADC)-ni Congress MDC Ashahel D Shira, Budbar salo United Democratic Party (UDP) dolo napangaha aro ua da·o ong·atna sienggipa Rajabala Assembly constituency-ni by-election-o UDP-ni candidate ong·e susagen ine parakataha.
Shira-ko UDP-ni president Metbah Lyngdoh, general secretary Jemino Mawthoh aro gipin dilgiparang rimchaksoaha aro uandaken Rajabala by-election-na UDP-ni tikitko Shira-na on·aha ine parakataha.
Rajabala by-election-o susana gita UDP-ni dilgiparang, candidate-ko sandiengachim aro uandaken ia by-election-na Congress dolni tikitko Rajabala-ni sianggipa MLA Dr Azad Zaman-ni jikgipa Hashina Yasmin Mondol-na on·ahani gimin Shira-ba ia by-election-o susana gita UDP-o napangskaaha.
Rajabala by-election-o UDP-ni candidate ong·e susana sienggipa Ashahel D Shira, da·o dipet GHADC-o Batabari GDC constituency-ni Congress MDC ong·engachim ine nikna man·a.
2013 bilsini Assembly election-oba Shira, Rajabala Assembly constituency-onin Independent candidate ong·e susaenba seokako man·ahachim indiba 2018 bilsini Assembly election-ode ua Congress dolni candidate Dr Azad Zaman-ni jako amako man·rikskaahachim. 2013 bilsini Assembly election-o seokako man·ani ja·man ua Congress dolchi dilenggipa gitcham sorkarina chakpaaniko on·ahachim aro uandaken ua somoio ua parliamentary secretary-ni kamkoba man·ahachim.
Indake ong·genchimoba, 2018 bilsini Assembly election-o Rajabala constituency-na Congress dolni tikitko Shira-na on·gija Dr Azad Zaman-na on·skaaha aro uandaken ia Dr Zaman-ni jako amako man·rikaha.
