TURA: Re·baenggipa October-ni 30 tariko ong·atna sienggipa Rajabala Assembly constituency-ni by-election-na nomination file ka·ani Sukrobar attamo matchotangaha aro ia by-election-na gimik sak 5 candidate-rang, dingtang dingtang salrango nomination file ka·aha.
Bon·kamgipa salo, United Democratic Party (UDP)-ni candidate Ashahel D Shira baksana BJP-ni candidate Kingstone B Marak aro Independent candidate Carla R Sangma, an·tangtangni nomination-ko Tura DC office-o Returning Officer CN Sangma-ni mikkango on·angaha.
UDP-ni candidate Ashahel Shira-ni nomination file ka·ani somoio a·dokni Home Minister aro UDP-ni dilgipa Lahkmen Rymbui, UDP-ni MLA sakgni, chong·motan Pius Marwein aro Samuel Sangma-ba dongpaahachim.
Shira-ni nomination file ka·ani ja·man BJP-ni candidate Kingstone B Marak, an·tangtangni lekkarangko on·eskaaha aro unbaksana Tura-ni BJP MDC Bernard N Marak dongpaskaaha.
Somoi bon·na skangmangmang ia by-election-o susaenggipa saksakamkam Independent candidate Carla R Sangma-ba an·tangni nomination-ko file ka·eskaaha.
Iana skang, Rajabala by-election-o susana gita NPP-ni candidate Abdus Saleh-ba Budbar salo aro Congress-ni candidate Hashina Yasmin Mondol-ba Bristibar salo, an·tangtangni nomination-rangko file ka·angahachim.
Rajabala by-election-na da·o gimik sakbonga candidate-rang nomination file ka·ahani gimin uamangni lekkarangko re·baenggipa October-ni 11 tariko nipilangskagnok.
Rajabala by-election-na gimik candidate sak 5 nomination file ka·a
Date:
Share post:
