TURA: Re·baenggipa October-ni 30 tariko ong·atna sienggipa Rajabala Assembly constituency-ni by-election-o susana gita United Democratic Party (UDP)-ni candidate Ashahel D Shira-ba mijal Sukrobar salo, an·tangni nomination-ko file ka·angaha.
GHADC-ni MDC ong·enggipa Ashahel D Shira, ia by-election-o susana gita Congress dolni tikitko man·rikjahani gimin adita salrangna skangsan UDP-o napskaahachim aro uandaken ua Sukrobar salo, an·tangni nomination-ko Returning Officer CN Sangma-ni mikkango on·angaha.
Uni nomination file ka·ani somoio UDP-ni dilgipa aro a·dokni Home Minister Lahkmen Rymbui-ba dongpaaha aro Shira-ni nomination file ka·ani ja·man kobor ra·timgipa manderang baksa agangrikengon, UDP dolba MDA sorkarini bak ong·enga aro Rajabala constituency-ni manderang, sorkario bak ong·enggipa dilgipakosa nangenga ine parakataha.
GHADC election-oba Shira, ia apsan constituency-onin seokako man·ahani gimin ia bye-election-ba ua chegipa ong·gen ineba Rymbui, an·tangni ka·dongchakenganiko parakataha.
“Chingni candidate Rajabala jolni MDC-san ong·ja indiba ua Rajabala-ni gitcham MLA-ba ong·ani gimin chinga ia by-election-oba chegipa ong·na ka·dongenga,” ine UDP-ni dilgipa aganaha.
UDP aro NPP dolgnian MDA sorkariko nangrime chalaienga indiba da·o gita election-ni somoirangode dolgnian jakgitele susana man·aia ineba Rymbui parakataha.
Ashahel D Shira-ni nomination file ka·eni somoio Ranikor-ni UDP MLA Pius Marwein, Baghmara-ni UDP MLA Samuel Sangma aro UDP-ni gipin dilgiparangba dongpaaha.
