TURA: Tura MDC Bernard N Marak mijal Robibar salo Phase-II aro Phase-III Tura water supply scheme project-ko ru·utatani bidingo matnange, songpanggiparangni GHADC water supply pipeline-rangko den·ani mamlako niatchina GHADC CEM Benedic R Marak-ko didiaha.
Tura water supply scheme-ni Phase-II aro Phase-III project-rango chi jokbaani cholgipin dongjani a·selo Tura jilao china namen dile neng·nikako man·enga, minggipin Tura-o pilak watenggipa chi line-rang Phase-1-oni ong·a jean skango GHADC-ni ning·o ong·achim.
Bernard-ni aganani gita, gong kror 35 tangkani Tura town Water supply scheme-ni aro Phase-I, Phase-II aro Phase-III water project-rangni bidingo Deputy Commissioner office-o RTI segataha uni gimin da·alona kingking maming aganchaka dongkujaenga.
Phase-I-ni file-rang gimaenga aro minggipino serika dongja jeon mongsonggipa line-rang man·chapa uni bidingo official-ni kobor ong·gija mitam officer-rang aganaha, Bernard matnangaha. Bernard-ni aganani gita, water works department-ni ning·o GHADC-ni watgipa chi line-rang official-ni gita ong·gija ra·badeangaha, indake GHADC uamangni line-rangko den·ani bidingo jajapilengaha.
