TURA: Re·anggipa Robibar salo, bame on·gimin NDFB bobil dolni mande sakgniko man·chape gimik sakgittam manderangko South Garo Hills a·jani police-rang, karkanao tarigipa silchidare pongbri aro gulirang baksa rim·na man·aha.
Ia manderangni gimin koborko man·soani ja·man South Garo Hills a·jani dolsa police-rang, Siju-Adura jolo Maruti 800 gari bolsako rim·soaha aro ia garioniko mande sakgittam baksana silchidarerangko rim·na man·aha ine kobor on·aha.
Rim·ako man·gipa manderangara, Kushdhwa songni bilsi 35 ong·gipa Kamal Khaklary, Dudhnoi-oni bilsi 34 ong·gipa Jamejoy Basumatary ba Sapru aro Buglamary Dudhnoi-oni bilsi 23 ong·gipa Abhijeet Basumatary ba Nonga minggipa manderang ong·achim. Rim·ako man·gipa mande sakgittamoni Kamal Kharklary aro Jamejoy Basumatary-de an·tangtangni bame on·gimin NDFB bobil dolni manderang ong·achim ineba kobor on·aha.
Rim·ako man·gipa manderang pilakan Assam a·doko donggipa Goalpara a·jaoni ong·achim.
Ia manderangoniko police-rang, karkanao tarigipa 7.65 mm pistol pongbri aro guli rongsniko man·aha ineba kobor on·aha.
Iani bidingo police-rang ning·tue sandianirangko dakdapengkua ineba u·iataha.
