Williamnagar Municipal office-ko rikna pangchakaniko songa

TURA: Williamnagar-ni Soil Bazar-o rikna sienggipa Williamnagar Municipal Board (WMB) office aro market complex-na mijal Budbar salo a·dokni Chief Minister Conrad Sangma, pangchakaniko songe on·angaha aro ia nokko rikna pangchakaniko songe on·anganio Williamnagar-ni MLA Marcuise Marak, East Garo Hills a·jani Deputy Commissioner Swapnil Tembe aro gipin official-rangba dongpae bak ra·angaha.

Ia office nok aro market complex-ko rikna gita pangchakaniko songe on·angani somoio a·dokni Chief Minister, jinmana aganprakangengon, ia nokara municipal office nok baksana market complex-ba dakjolengani gimin ia nokko rikmanahaode bading chiwale cha·enggiparangnasan ong·aigija chadamberangna aro dingtang dingtang self help group-rangnaba bading chiwalani kamrangko ka·na chol ong·gnok ine parakataha.

Ru·uta bilsirangonin Williamnagar Municipal Board-ko namdapatna miksonganirang dongachim aro da·o iako chu·sokatna man·engaha ineba ua an·tangni kusi ong·aniko parakangaha.

Sorkarini a·bachengatgipa kamrangni gimin talataniko on·angengon, Nengkhra-Williamnagar ramako taridapna, Williamnagar Water Supply Project-ko a·bachengatna aro uandakgipa gipin kamrangna sorkari da·o tangka paisarangko chamengaha aro ia kamrangko bakan a·bachengatgnok ine Chief Minister parakataha.

Ia WMB office aro market complex-ko rikna gita krenge kamrangko ka·dilahani gimin ua dingtangmancha Williamnagar-ni MLA-ko aro WMB-ni chairman-koba mittelpilangaha.