TURA: Garo Hills-ni dingtang dingtang SSA skulrango skigiparangna jabrini dormaharangko on·kujaengani gimin All Garo Hills SSA School Teachers’ Association (AGHSSASTA)-ni ning·o donggipa skigiparang, re·baenggipa October 20 tariko sorkarini kamna suk ong·gijaniko mesokna gita jingjengataniko dakna tik ka·aha ine u·iataha.
AGHSSASTA-ni president Labingstone G Momin-ni u·iatani gitade, adita salrangna skang association-ni dilgiparang, Meghalaya a·dokni Chief Minister Conrad K Sangma-ko Williamnagar-o gronge, skigiparangni man·na nangkuenggipa dormaharangko changsanon on·china gita mol·molahachim indiba chief minister, uamangna maming ka·dongatani kattarangko on·na man·jahani gimin uamang, re·baenggipa October-ni 20 tariko jingjengataniko dakna manchiaha.
“Chinga indita jarangna chakchike kamrangko ka·engoba, ma·mong SSA-oni tangka watatako sengkuchinasa chingko chief minister aganaha. Chinga jabri jabonga ong·pile dormaha gri kamko ka·engon, chingna jasa ba jagnini dormahako watatanikode chingna nangja aro chingna chu·gimik jabrini dormahakon changsanon on·na nanga,” ine AGHSSASTA-ni president parakataha.
