SHILLONG: Meghalaya a·dokko Khasi-Jaintia aro Garoland dake bak ka·china dabiengon, iani bidingo a·dokni BJP dolde jegalenga ong·ja aro namnikpaengaba ong·ja indiba iani bidingo a·doko songdongenggipa manderangni nangnikanikosa ra·na nanga ine parakataha.
“Chinga iana chakpaenga ba jegalengaba ong·ja indiba manderangni nangnikaniko ra·china gitasa chinga nangnikenga,” ine Robibar salo BJP-ni state vice president aro Tura-ni BJP MDC Bernard N Marak parakataha.
Meghalaya a·dokko Khasi-Jaintia Hills-o songdongenggiparangna dingtang aro Garo Hills-o songdongenggiparangna dingtang dake bak ka·china dabina gita Hill State People’s Democratic Party (HSPDP) aro Garo Hills State Movement Committee (GHSMC), re·anggipa July jaon dingtangmancha coordination committee-ko songe donmanahachim.
HSPDP aro GHSMC dolrangni nangrime songe donanggipa coordination committee, Meghalaya a·dokko Khasi-Jaintia aro Garoland a·dok dake bak ka·na, simarangko salna gita kamrangko ka·dilna siengachim.
Indake ong·engon, Meghalaya a·dokko bak dakna dabianiara badiaba political dolrangni dabianisan ong·na nangja indiba a·doko songdongenggipa manderangni nangnikaniba ong·na nanga ine Marak janapatenba, a·doko songdongenggipa manderangan bak dakaniko nangnikjaenga ong·ode manderangni kosako kamko ka·na nangja ine parakataha.
“Bak dakaniko manderang nangnikenga ong·ode ong·aia indiba manderangan iako jegalenga ong·ode uamang manderangni nangnikaniko ma·sichakna nanga,” ine BJP-ni state vice president aganaha.
Meghalaya a·dokko bak dakna gita HSPDP-ni Hopingstone Lyngdoh sagi aro Garo National Council (GNC)-ni Clifford R Marak a·bachengdilahachim ine nikna man·a.
