SHILLONG: Meghalaya a·dokni damgittam Assembly constituency-rang, chong·motan Rajabala, Mawryngkneng aro Mawphlang Assembly constituency-ni by-election-ko re·baenggipa October-ni 30 tariko ong·atengon, ia damgittam by-election-kon Congress dol chena krengenga ine Meghalaya Pradesh Congress Committee (MPCC)-ni president Vincent H Pala parakataha.
“Da·o dipetde Congress dolna balwarang namenga indiba ia damgittam constituency-ni by-election-o Congress dolni cheani ba amako man·anide manderangni jakosa ong·aigen,” ine Pala parakataha.
NPP aro UDP dolgnian sorkariko rikgipa dolo ong·engani gimin ia by-election-ni result-ko da·o dipet rongtale agansona man·jawa ineba ua aganaha.
Ia by-election-o Congress dolna gipin a·dokrangoni Congress dilgiparang campaign ka·na re·bajawa ineba MPCC-ni president parakataha.
Congress dolni gita Mawphlang by-election-na Kennedy C Khyriem-ko, Mawryngkneng-na Highlander Kharmalki-ko aro Rajabala by-election-na sianggipa MLA Dr Azad Zaman-ni jikgipa Hashina Yasmin Mondal-ko candidate dake seokahachim.
