TURA: West Garo Hills a·jao aro mongsongbate Tura jolrango COVID-19 man·giparang ka·sine komiroroangengon, da·o dengue sabisiko man·giparang batrorobaskaengaha aro uandaken batanggimin adita salrangni gisepon Tura bazar jolrango sak 16 manderang dengue positive ong·aha.
Tura bazar jolrango sak 16 manderangko dengue sabisina porikka ra·anio positive ong·ahani gimin Tura jillani bang·a biaprangon samrangko satna a·bachengataha.
Ia dengue sabisiara Aedes minggipa gangguni chikanichi ong·atronga aro ia dengue sabisini chinrangara fever saani, ka·rekani, chisatani, be·eno naritchekani, be·en saani aro uandakgipa chinrangan ong·achim.
West Garo Hills a·jani Deputy Commissioner Ram Singh-ni u·iatani gitade, da·o dipet Tura-o dengue sabisiko man·giparang sak 16 gapaha aro ia sabisiko man·giparangara bang·batan Tura bazar jolrangonisa ong·batani gimin ia jolrango samrangko satna a·bachengataha. Iani bidingo ua West Garo Hills a·jani District Medical & Health Officer aro NVBDCP-ni official-rang baksa chanchirimna tom·aniko ong·atenga ineba ua parakataha.
Ia antio Entomological dolni official-rang, Tura-ni Fancy Valley aro samba jolrango Aedes gangguni bitchi chi·aniko am·sandienba, ia jolrango bang·en ganggu jo·ongrangko man·ahachim.
Indake ong·engon, dengue sabisina sorkarini gita Tura Civil Hospital-o indin porikka ra·e nina on·engani gimin ia sabisini chin donggipa manderangkode ia hospital-ona re·ange an·tangtangko porikka ra·e nichina gita district administration didiataha.
“Tura Civil Hospital-o dengue sabisina Eliza test-ko indin ka·e on·engani gimin anga ia sabisini chin donggipa manderangkode ia hospital-ona re·ange an·tangtangko porikka ra·e nichina didiatenga. Mitam manderang, private clinic-rangona re·ange ta·rake result man·gipa test-rangko ka·enga indiba iandakgipa test-rango an·ching ka·dongna man·breja,” ine Singh parakataha.
Ganggurang bitchi chi·na man·jana gita noktangtango sikkonge dongenggipa chirangko galjringchina aro attamo seng·gnangan nokni kelki aro do·garangko chipgripe donchina gitaba ua Tura jillao songdongenggiparangko didiataha.