TURA: Rajabala Assembly constituency-ni by-election-o susaenggipa gipin dolrang National People’s Party (NPP)-na aro una kenengani giminsa uko gipini biapni mande ine salondrana jotton ka·enga ine Bristibar salo NPP-ni candidate Abdus Saleh, Rajabala constituency-ni ning·o donggipa Takimagre songo, jinmana parakataha.
Re·baenggipa October-ni 30 tariko ong·atenggipa Rajabala Assembly constituency-ni by-election-o NPP baksana Congress, United Democratic Party (UDP) aro Bharatiya Janata Party (BJP) dolrangba susaengachim ine nikna man·a. Ia by-election-o ia dolbri political dolrang baksana Independent candidate saksaba susaengachim.
Indake ong·engon, ua an·tangde darang jatkoba mikkang nitegipa mande ong·ja aro pilak jatrangna apsan dake kamko ka·e on·na namgnikgipa mandesa ong·a ineba ia tom·anio Saleh aganaha.
“Angko Rajabala constituency-o gipin biaponi re·bagipa mande ine opposition dolrang aganenga indiba uamang NPP-na aro angna kenesa iandake angko manderangni mikkango salondrana jotton ka·enga. Angade jat basee kamko ka·gipa ong·ja aro skangoba anga Mahendraganj-o changgittamna MLA ong·e Meghalaya sorkarioba minister ong·angaha. Ia changoba angko na·simang seoktaigenchimode anga na·simangna kusi ong·e dangdike on·na ku·rachakenga,” ine NPP-ni candidate Saleh aganaha.
Garo Hills chonbegipa a·ja ong·genchimoba PA Sangma sagini bikote donanggipa NPP dol da·o a·songo niksengbatgipa dolchet National party-rangoni dolsa ong·engaha ineba ua aganaha.
Ia tom·anio Meghalaya a·dokni Chief Minister aro NPP-ni national party Conrad Sangma-ba dongpae, manderangna aganprakengon, jat basegija an·tangtangna nambatgipa dilgipakosa seokchina didiangaha.
NPP dolara Garo Hills-oni ong·katgipa national party ong·a ineba ua NPP-ko apsan nangrime rikchina gita jolni manderangko didiangaha.
Rajabala by-election-na a·dokni Chief Minister baksa Williamnagar-ni MLA Marcuise Marak, Bajengdoba-ni MLA Pongseng Marak, North Tura-ni MLA Thomas Sangma aro NPP-ni gipin dilgiparangba an·tangtangni candidate Abdus Saleh-na campaign-ko ka·enga ine u·iataha.