SHILLONG: Bristibar pringo West Khasi Hills a·jani Meghalaya Rural Bank (MRB) Rambrai Branch-ko dakait dakna jotton ka·anina police-rang, mande sakdokko rim·aha.
West Khasi Hills a·jani SP HG Lyngdoh-ni kobor ra·timgiparangna u·iatani gitade, ma·sina man·gijagipa manderang, ia bank-ko dakait dakna napenga ine Bristibar pring 3:29 bajimango police-rang koborko man·soenba, Nongstoin police station-ni OC-ko ta·raken ua biapona re·angchina aro Rambrai songni Sordar-na u·iatsochina ge·etaniko on·ataha. Rambrai songni sordar-na u·iatsoani ja·man bakan Nongstoin PS-ni OC, dolsa police-rang baksa ua biapona dariangaha.
Rambrai songni sordar aro songni adita manderang, bank-ona re·angon, uamang adita sak manderangko ua biapo nikeaha aro ia manderang, songni manderangko nike ua biaponi kataha. Indake ong·genchimoba, ja·mano ia manderangko Nongstoin-ni OC aro uni sipairang, WB24C 2031 Maruti car 800-o Nongstoin-chipakna katangengmiting somoio Mawlieh-o rim·sona man·aha.
Rim·ako man·gipa manderangara Umroi Umden-ni bilsi 41 ong·gipa Plam Syiem, Miangsiang-ni bilsi 30 ong·gipa Loren Dkhar, Mawdumdum songni bilsi 31 ong·gipa Lorensius Kharbani, Pyndengrei-ni bilsi 48 ong·gipa Ores Lyngkhoi aro Umsaw Nongru songni bilsi 35 ong·gipa Tiful Phyllut ong·a.
Police official-ni u·iatani gitade, ia manderang bank-ni CCTV camera aro computer-kode nosto ka·aha indiba tangka donchakgipa bank locker-ko kulina man·jae tangkarangkode man·angjaha.
