SHILLONG: Re·baenggipa October 30 tariko, Meghalaya-ni ge·gittam Assembly seat-rangna by-election ong·atani somoio COVID-19 saenba quarantine donggiparang, bilsi 80 gapgiparang aro be·enni gita bilgriani gnanggipa manderang, postal voting-ko dakna man·gen ine health official-rang aganaha.
Polling station-rangona re·e puona neng·nikanirangko man·ani gimin aro COVID sabisi bakrikrikna kenchakanirang dongani gimin iandakgipa manderangna, Election Commission of India, postal voting (Form 12D)-ko a·bachengataha.
Postal gita puonaniko dakna gita sak 300, mongsongbate bilsi re·anggimin manderang uamangni bimingrangko seataha ine Chief Electoral Officer, Frederick Roy Kharkongor agangaha.
Noktangtangoni puonatnasienggipa sak 300 voter-rangoni, sak 271-de bilsi 80 gapgiparang ong·a, jeon sak 29-de be·enni gita bilgriani gnanggiparang ong·a ine official aganaha.
Ia biming segatgimin manderang, polling station-rangona re·anggijan uamangni noktangtangonin postal ballot-rang gita puonatna man·aignok ine Kharkongor aganaha.
Da·o ge·gittam assembly seat-rangna by-poll ong·atenggipao me·asa voter-rangna batede me·chik voter-rangan bang·batenga.
Mawryngkneng assembly constituency-o dam 60 polling station-rang donggen jeno sak 18,986 voter-rangko man·chape gimik sak 36,751 voter-rang donga. Mawphlang assembly constituency-o dam 50 polling station-rang donggen, jeon sak 17,475 me·chik voter-rangko man·chape gimikchi sak 33,194 voter-rang donga.
Unomitingo Rajabala assembly constituency-o dam 58 polling station-rang donggen, jeon sak 18,986 me·chik voter-rangko man·chape gimikchi sak 36,751 voter-rang donga.
Mawryngkneng-ni MLA David A Nongrum, Rajabala-ni MLA Dr Azad Zaman aro Mawphlang-ni MLA Syntar Klas Sunn mangni siani a·selo ia ge·gittam assembly constituency-rangna by-poll ong·atna nangao ga·akaha.
