TURA: UDP, Sonibar salo poll campaign-ko bilakatna kam ka·engon West Garo Hills District-oni party candidate Ashahel D Shira-na campaign ka·angaha, jeon party-ni dilgiparang, voter-rangko salna gita jotton ka·angaha.
Home Minister Lahkmen Rymbui aro Ranikor MLA Pius Marwein – uamang party-ni candidate Ashahel D Shira baksa constituency-ni dingtang dingtang songrangona re·ange manderangko grongaha.
Indake ong·engon bilo donge kam ka·enggipa NPP-ba party-ni candidate Abdus Saleh-na chakna raken jotton ka·enga. Chief Minister Conrad Sangma an·tangan adita salrangoni constituency-o camping ka·enga.
Uandake Congress-ba poll campaign-o bak ra·engon jinma manderang tom·dakaniko gelna tik ka·skaenba Sonibar salo party-ni candidate Hasina Yasmin Mondal-na chakpae nokantiona re·roroe manderangko grongaha. Bang·a dilgiparang MDC-rang baksa vote-na nokantiona re·roroe manderangko grongeaha.
Indake ong·engon kobor man·soani gitade party-ni dal·dalgipa dilgiparang jekai- gitcham Chief Minister Mukul Sangma, MPCC President Vincent Pala, Assam-oni gitcham Minister Rekibul Hussain- uamang Robibar salo constituency-ona sokangnaba donga.