TURA: Garo Hills-ni Auxiliary nurse midwifery (ANM) aro Lady health visitor (LHV)-rang, manderangna an·seng baljokaniko on·na gita rakbee kamrangko ka·engoba, an·tangtangni man·na nanganirangko man·tokjae neng·nikanirangko chagrongna nangtokenga ine All Garo Hills ANM/LHV Association parakataha.
Association-ni parakatani gitade, 2017 bilsini December jaon, ANM aro LHV-rangna japrako gong 1500/- TA-ko sorkari tik ka·manahachim indiba da·o bilsi 3 ja 10 ong·pilengahaoba uamang, ia TA-rangko man·tokkujaengachim. Apsan daken, grade wise pay level-koba Meghalaya Finance Pay revision-o order-ko 2019 bilsini November jaon on·ahachim indiba da·o bilsi 1 ja 11 ong·pilahaoba ia pay-ko ANM/LHV-rangna on·kujaenga ine association parakataha.
“Chinga salo konta 24 neng·skime aro duk chake kamrangko ka·engoba chingna chamgimin man·gnirangko man·jaenga. Chinga chel·begipa biaprangona ja·arangchi re·e dingtang dingtang kamrang, jekai emergency aro home delivery-rangna re·na nanga indiba maming TA/DA-rangko chinga man·pajaenga. COVID-19 vaccination ba tika su·anikoba chinga korostangchisa re·rurae su·enga indiba chingna chingni man·gnirangko sorkari on·na gisik nangjaenga,” ine AGHANM/LHVA parakataha.
ANM aro LHV-rangni man·gnirangko ia October jani gisepon on·china gitaba Association, a·dok sorkariko mol·molataha.
