TURA: East Garo Hills a·jao Rongon dolongko rika matchotkujaengani gimin Williamnagar-ni FKJGP aro GSU dolrang, ia dolongko rikenggipa contractor-ni kosako East Garo Hills a·jani Deputy Commissioner-na badi ka·doangaha.
Ia dolgni NGO-rangni parakatani gitade, ia dolongara Rongongre aro gipin songrangko Williamnagar-ona nangdimeatna gita Rongon chiringko kabatenggipa dolong ong·achim indiba ia dolongko rika matchotkujaengani a·selan Rongongre aro gipin songrango donggipa manderang, Williamnagar-ona re·ruraanio neng·nikanirangko chagrongna nangtokengahachim.
“Ia dolongara Rongon chiring nalsao donggipa dingtang dingtang songni manderangna mongsonggipa re·a doani chol gita ong·engachim indiba ia dolongko re·anggipa bilsionin rika matchotgija donchipenga,” ine Williamnagar-ni FKJGP aro GSU dolrang parakatenba, ia dolongko sal 15-ni gisepon rikna a·bachengpiltaichina ia dolongko rikenggipa contractor-rangna somoiko on·angaha.
