SHILLONG: Meghalayao ge·gittam assembly constituency-rangna October 30 tariko election by-election ong·atengon, political party-rang, an·tangtangni candidate-tangtangko cheatna gita da·omitingo bilaken campaign ka·chichatokenga, jeon campaign ka·ani da·o salgnisan dongaiahachim.
A·doko sason ka·enggipa National People’s Party (NPP), opposition Congress aro gipin political party-rang krengbate campaign-rangko ka·tokenga.
Apsandake, Bharatiya Janata Party (BJP) aro United Democratic Party (UDP)-ni dilgiparangba bilaken campaign ka·enga, jemangan NPP-ni re·dilgipa Meghalaya Democratic Alliance (MDA) sorkarini mongsonggipa bakrimgipa party-rangba ong·taia.
Mawryngkneng aro Rajabalani sakgni Congress MLA, David A Nongrum aro Dr Azad Zaman aroba Mawphlang-ni Independent legislator, Syntar Klas Sunn mangni siani a·sel ia ge·gittam assembly seat-rangna by-election ong·atna nangao ga·akaha.
Sason ka·enggipa dol aro opposition Congress, ia ge·gittam seat-rangkon chegopna gita krengtokenga, maina re·baenggipa 2023 bilsion general assembly election ong·engahani gimin ia by-poll, dolgni party-rangnan mongsonggipa ong·enga.
Ia ge·gittam seat-rangko chegopna gita chinga ka·dongenga, maina da·o a·doko sason ka·enggipa sorkario manderang ka·dongna man·tokjaengaha ine a·gipi Congress legislator Dr. Mazel Ampareen Lyngdoh aganaha. Congress party, Mawryngkneng-o Highlander Kharmalki-ko, Mawphlang-o gitcham legislator Kennedy C Khyriem-ko aro Rajabala seat-na gitcham MLA-ni jikgipa Hashina Yasmin Mondal-ko susaatenga.
Ian 2023 assembly poll-na skang sason ka·enggipa aro opposition dolna porikka ka·soani gita ong·genma ine sing·anina aganchakengon, porikka ka·e niani ine angade aganjawa, indiba a·doko chagrongenggipa neng·nikanirangna chanchirimna Congress-na mingsa cholsa ong·pilgen. Porikka ka·e nianide sorkarinasa ong·gen. Opposition-na maidakgipa porikka ka·ani ba test-ko nanggen. Chingnade maming gimaani dongjawa, chingnade man·dapanisa ong·nasienga, Lyngdoh aganaha.
Unomitingo, seat ge·gittamkon NPP chegopgen ine Meghalaya NPP president, Dr. Wanwei Roy Kharlukhi a·kangskaenga. NPP-ni kosako maming ja·donggaatanirang dongja, chinga ongipa gadangonin pilak obostarangko nigrike kamrangko ka·enga ineba Kharlukhi aganaha.
Indake ong·engon, Mawphlang aro Rajabala assembly seat-rangkode chinga man·telaigen ine UDP General Secretary, Dr. Jemimo Mawthoh a·kangskaenga, jemangan Mawphlango Indiani gitcham robol kal·gipa Eugeneson Lyngdoh aro Rajabalao gitcham MLA aro da·oni Garo Hills Autonomous District Council (GHADC) membor Ashahel D Shira-ko susaatenga.
