TURA: Meghalaya a·dokni skanggipa Chief Minister Captain Williamson A Sangma sagini chang 31-gipa siani salko Sombar salo, Tura aro Baghmara-o gisik ra·e maniangaha.
Tura-o Capt Sangma-ni siani salko manina gita dingtangmancha tom·aniko Garo Hills Autonomous District Council (GHADC) compound-o ong·atangaha aro ia tom·anio GHADC-ni Chief Executive Membor (CEM) Benedic R Marak baksana GHADC-ni Chairman Rakesh A Sangma-ba bakko ra·angaha.
Ia tom·anio Capt Sangma-ni janggi tanganiko nipilangan baksana una mande ra·pilskaanirangkoba dakangaha aro ja·mano GHADC-ni membor-rang Tura Hawakhana-o donggipa Captain Sangma Museum-onaba re·ange, uni nokdangni manderangkoba grongeaha.
Ia salo dingtangmancha Captain Sangma-ko gisik ra·e aro una mande ra·pilskaaniko dake jinma bi·rimanikoba dakangaha.
Apsan daken, Captain Sangma-ni siani salko uni atchiram South Garo Hills a·jaoba maniangaha aro ia salko maniani bak gita dingtangmancha tom·aniko Baghmara-ni Capt Williamson Memorial Park-o ong·atangaha.
Baghmara-o Capt Sangma-ni siani salko gisik ra·na tom·aniko ong·atanio Rongara-Siju constituency-ni MLA Rakkam A Sangma, mongsonggipa sokgipa ong·e bakko ra·angaha aro uni jinmana aganprakanio ua dingtangmancha Capt Sangma-ni on·gilanggipa kamrangni gimin gisik ra·atpilaniko dakangaha.
Capt Sangma-ni nikjumanganggipa kamrangni gimin gisik ra·atpilangengon, Baghmara-o nambatgipa government college-ko man·anian uni jumangrangoni mingsa ong·achim aro da·alo Meghalaya a·dokni Chief Minister, Baghmara-o Capt Williamson Memorial College-ni building-ko rikna tangka paisarangko chame on·ahani gimin ia jumang da·o chu·sokgipa ong·aha ine Rakkam parakataha. Baghmara-oni Shillong-ona nangdimegipa National Highway ramako man·aniba uni jumangrangoni mingsa ong·achim aro da·o bilsi 50-ni ja·man ia jumangba chu·sokgipa ong·engaha ineba ua aganaha.
Ia program-ko ong·atanio Baghmara-ni District Police Force, SOK Parade-ko dake mesokangaha aro South Garo Hills a·jani Deputy Commissioner-ni dilanichi Officers Club-ba gitko ring·e manderangko an·saoatangaha.
Iani ja·mano Baghmara DC Office complex-o Multi Facility Centre-koba Rakkam Sangma-ni jakchi nokdonggae on·angjolaha.
