TURA: Raksamgre primary health centre (PHC)-o doctor-rang dongjae songni nokni manderang neng·nikanirangko chagrongna nangtokenga ine GSU Western Zone (West) Raksamgre aro GSMC Pedaldoba regional unit parakataha.
Ia dolgni NGO-rangni parakatani gitade, Raksamgre PHC-o doctor-rang dongjaengani a·sel jolni manderang, Tikrikilla PHC aro dam rakgipa private hospital-rangonasa re·ange sanna bananirangko ra·na nangenga aro chatro chatrirang, jemangan an·tangtangni certificate-rangko attest ka·na nangengachim, uandakgipa chatro chatrirangba neng·nikanirangko chagrongna nangtokenga.
“Raksamgre PHC-o doctor-rang dongjan baksana Raksamgre-oni Tikrikilla-ona dakanggipa ramarangba namsrangjani a·sel sanna bananiko ra·na re·a doanio manderang bang·a neng·nikanirangko chagrongna nangtokenga. Raksamgre PHC-o ambulance-rang dongjani a·selba saenggipa manderangko gipin biaprangona ra·ruraanirango neng·nikanirangko chagrongna nangtokenga,” ine dolgni NGO-rang parakataha.
Raksamgre constituency-ni MLA Benedic R Marak, jean GHADC-ni chief executive membor (CEM)-ba ong·engachim, ua joltangna maming simsak nirokanirang dongjaenga ineba ia dolgni NGO-rang matnangataha.
