TURA: SSA skulrango skigiparangna jabrini dormaharangko on·kujaengani gimin October-ni 26 tariko skigiparang, Williamnagar-o jinma tom·e re·jomaniko ong·atenga ine All Garo Hills SSA School Teachers’ Association (AGHSSASTA) parakataha.
AGHSSASTA-ni u·iatani gitade, SSA skulrango skigiparangna re·anggipa June jaoni September jaona kingking jabrini dormaharangko on·kujaengachim aro ia dormaharangko on·china skigiparang changni chang sorkariko didiahaoba skigiparangni mol·molanirangko sorkari knachakjaengani gimin skigiparang, Mongolbar salo dingtangmancha sorkarini kamko jegalna gita jinma tom·e re·jomaniko ong·atenga.
“Chinga chingni man·na nangkuenggipa dormaharangko on·china changni chang sorkarina seanirangchi mol·molahaoba chingni mol·molanirangko knachakjaengani gimin sorkarini kamo suk ong·gijaniko parakenga. Indita chang mol·molani ja·manoba sorkari nachil songteljaengani giminsa chinga sorkarini kosako jegale jingjengataniko dakna tik ka·aha,” ine AGHSSASTA-ni secretary B Ch Marak parakataha.
Skigiparangni u·iatani gitade, jinma tom·bimonganiko Rongrenggre Government Higher Secondary School kal·chakramo ong·atgen aro uni ja·man Williamnagar bazar gita Deputy Commissioner-ni office-ona skigiparang jinma re·jomanggen.