TURA: Rajabala Assembly Constituency-ni by-election-na United Democratic Party (UDP)-ni candidate Ashahel D Shira-na Hill State People’s Democratic Party (HSPDP)-ba chakpaaniko on·enga aro uandaken Rajabala constituency-ni dingtang dingtang biaprango, HSPDP-ni dilgiparangba UDP-ni dilgiparang baksa Shira-na campaign-ko ka·angaha.
Rajabala by-election-na dingtang dingtang candidate-rang aro political dolrang rakbee kamrangko ka·chichatokengon, UDP-ni president aro Meghalaya Assembly-ni Speaker Metbah Lyngdoh baksana HSPDP-ni dilgipa Renikton Tongkhar-ba Rajabala-ona re·bae UDP-ni candidate Ashahel D Shira-na campaign ka·angaha.
Uamang baksana UDP-ni sakgipin dilgipa aro a·dokni Cabinet minister Kyrmen Shylla-ba Rajabala-ona re·bae Shira-na campaign ka·angaha.
UDP aro HSPDP-ni dilgiparang, Rajabala constituency-ni ning·o donggipa A·chik songrang, jekai Gomaijhora, Takimagre aro Bhajamara songrang baksana Bhaitbari songonaba re·ange UDP-ni candidate-na campaign ka·angaha.
Ia songrango UDP-ni president aro Assembly-ni Speaker Metbah Lyngdoh, jinmana aganprakangengon, UDP-ni candidate Ashahel Shira, ia constituency-o namroro silroroaniko ra·bana nangnikengani giminsa uamang uko UDP-ona rimnapaha ine parakangaha.
“Uni chingona re·bae Rajabala by-election-o susana bi·ani gimin uni miksonganiko chinga sing·on ua Rajabala-na aro Rajabala constituency-ni manderangna kam ka·na skani donganiko chingna parakaha,” ine Lyngdoh aganaha.
UDP-ba MDA sorkarini mongsonggipa bakan ong·paengani gimin ia by-election-o Shira-ko seokgenchimode ua bang·a namgnirangko ia constituency-na ra·bana man·gen ineba ua aganaha.
Ia tom·anirango HSPDP-ni dilgipa Renikton Tongkhar-ba songni manderangna aganprakengon, joltango ku·cholsan ong·na nangani gimin aro namroro silrororaniko ra·bana nangengani gimin aganangaha.
