TURA: Goeragre-oni Babadam bazar-ona dakanggipa rama da·o namsrangjaengahani a·sel salanti kam nangana re·ruraenggipa manderang aro mongsongbate skulrangchi re·ruraenggipa chatro chatrirang neng·nikanirangko chagrongna nangtokenga ine Garoland State Movement Committee (GSMC) Babadam unit parakatenba, ia ramako ta·raken taripile on·china gita sorkario dabiangaha.
GSMC Babadam unit-ni general secretary Senggrim A Sangma-ni parakatani gitade, ia ramara Selsella aro Garobadha jolrango naegipa rama ong·e ian Babadam jolrango songdongenggipa manderangnasan ong·aigija dingtang dingtang biaprangoni re·ruraenggipa manderangnaba mongsonggipa rama gita ong·engachim indiba ia rama ru·uta bilsirangna skangonin nosto ong·ahani a·sel da·o ia ramako re·rurana jakkalenggipa manderang aro mongsongbate skul, college-rangchi re·ruraenggipa chatro chatrirang neng·nikanirangko man·na nangtokengahachim.
“Ia ramani bidingo chinga 2018 bilsimangonin North Tura-ni MLA Thomas A Sangma-na changni chang seanirangchi aro an·tangtangba gronge u·iatahachim indiba ia ramako national highway-o chapate sanction ka·manjok ine tol·e Goeragre bibraoni kilometre gittammangmangkosan taridape on·aiaha,” ine GSMC Babadam unit-ni general secretary, suk ong·gijaniko parakataha.
Indake ong·engon, ia ramako jolo songdongenggipa manderangni namgninasan ong·aigija ia ramako salanti re·ruraenggipa manderangni namgninaba ta·raken taripile on·china gita GSMC Babadam unit, a·dok sorkariko didiataha.