SHILLONG: Salgro salaram a·dokrango National People’s Party (NPP)-ko bilakbatatna gita a·dokni tangka paisarangko jakkalsretenga ine Opposition Congress dolni matnanganiko Budbar salo, NPP-ni national vice president aro a·dokni Deputy Chief Minister Prestone Tynsong jegalataha.
NPP-ni kosako iandakgipa matnanganirangko dakjachina Congress dolni dilgipa HDR Lyngdoh-ko didiatengon, NPP-ko bilakbatatna gita uamangni krenge kamko ka·aniara opposition dolrangni maming bak dongja ine Tynsong parakataha.
“Ian NPP-ni ning·o kam ka·gipasa ong·aia aro iano opposition dolrang mamingkoba aganna bil dongja. HDR Lyngdoh-ni on·gilgipa tangka paisarangba indide Congress dolni tangka paisarangsama?” ine Deputy Chief Minister sing·doangaha.
Ua an·tangan Congress dol baksa ru·uta bilsirangna apsan kam ka·rime Congress dolni kamrangni gimin namen ma·sia ine talatangengon, Congress MLA-rang bang·batan doltangni tangka paisarangkon on·gilna gita jakkalronga ine Tynsong matnangataha.
Ia somoio NPP-ko dolko salgro salaram a·dok gimikon bilakbatatna kamko ka·enga ine janapatengon, doltangko bilakbatatna kamko ka·aniode maming ong·gijani dongja ine Tynsong parakataha.
A·songni dingtang dingtang biaprango NPP dolko bilakbatatna gita a·dokni tangka paisarangko jakkalenga ine a·dokni gitcham Home Minister aro Congress dolni dilgipa HDR Lyngdoh matnangatahachim.
NPP dol, Delhi-o gong kror 20 koros ong·e doltangni office nokko rikaha ineba ua matnangahachim.
