SHILLONG: Meghalaya a·dokni pilak biaprangon skulrangko class 1-oni class 12-ona kingking chu·gimik kulipilna man·gnok ine sorkari official-rang parakataha.
Sorkari official-rangni u·iatani gitade, skulrangko chu·gimik kulipilengoba ma·a paarangni nangnikani gitasa ong·gen aro class ge·prakon sak 15-oni sak 20 chatro chatrirangsan dongna man·aigen. Iana class ge·prakni chatro chatrirangko bak dakenba, salsa watchange class-rangko ra·skana man·gen ineba official-rang u·iataha.
Classroom-rango bench ge·prakkon feet 6 chel·grike donna nanggen aro skie on·ani somoiba salprako konta gittamoni konta bri batna nangjawa ine official-rang u·iataha.
Da·o dipet skulrango cultural program ba kal·susaani program-rangko ong·atna man·kujawa.
Nanggitan somoirangona skulrango dingtang kuturirangko donan baksana joltangni health department-rang baksa nangrimani dongna nanggen ineba u·iataha.
Skulo poraienggipa aro kam ka·enggiparangni namgnina skigiparang aro kam ka·giparang pilakan COVID-ni chu·gimik tikarangko su·e ra·na nanggen aro tika su·kugijagipa manderangde sal 10-prakon RTPCR test-ko ka·e test certificate-ko skulni dilgipana on·skana nanggen ineba official-rang u·iataha.
Indake ong·engon, a·jatangtango ong·enggipa obostani kri skulrangko kuliani bidingo chanchie ja·kuko de·china gita deputy commissioner-rangna bilko on·manaha ineba sorkari official-rang parakataha.